POLO SAN MARTIÑO, TROMPOS AO CAMIÑO
Este curso, dende a área de Educación Física, queremos propoñer a conmemoración do “Día do Peón”, que se celebrará xunto co Magosto, o venres 11 de novembro.
Nas sesións de Psicomotricidade e de Educación Física traballaremos dende o xoves 27 de outubro ata o xoves 10 de novembro os seguintes contidos:
· Leremos o Manifesto do “Día do Peón” e falaremos sobre este xogo popular e as súas posibles vivencias.
· Coñeceremos distintos tipos de peóns e a forma de bailar cada un.
· En Infantil xogaremos con bailaretes como iniciación ao peón.
· En Primaria xogaremos con bailaretes de madeira e peóns segundo a destreza do alumnado.
· A maiores, dende a primeira semana de novembro o alumnado que o desexe poderá traer o seu peón da casa para xogar con el no recreo.
PROPOSTA PARA AS TITORÍAS DE INFANTIL E PRIMARIA
Para preparar dita conmemoración animamos a todas as titorías que participen no desenvolvemento de contidos relacionados co Día do Peón. A continuación mostramos algunhas propostas, das cales podedes elixir as que mellor se adapten ao voso alumnado ou elaborar outras que consideres oportunas.
Facer bailaretes de cartón, con tapóns de plástico, con chapas,... Estes bailaretes poderán usalos despois o día que celebremos o Día do Peón.
Traer cada neno/a o seu peón de madeira da casa e decoralo no cole. (Os que aínda non teñan peón animalos a mercar un porque se poderá xogar con el en moitas máis ocasións e tamén nos vindeiros cursos).
Facer un peón estilo Origami.
(Vídeo titorial no seguinte enlace: https://www.youtube.com/watch?v=0XGGNQlzrCs
Buscar refráns relacionados co Peón ou Buxaina e expoñelos pola aula ou corredores.
Pintar un peón e sinalar as partes do mesmo.
Realizar algún dos seguintes xogos interactivos pinchando nas seguintes ligazóns:
Copiar no caderno a cantiga para bailar o peón que aparece no Manifesto e facer un debuxo dun peón ou de nenos e nenas xogando ao peón.
O primeiro que temos que facer é coller o peón cunha man e coa outra o cordel , chamado propiamente piola. A continuación empezamos a atar ou enrolar o peón coa piola. Para iso comezamos a atalo ben no pirucho ou no ferrón, a gusto de cada un. Finalmente erguemos a man ata riba da cabeza e a de un, dous e tres, lanzámolo ao chan e a danzar ao ritmo desa canción que nos di:
Coa miña buxaina…baila,baila,baila
E a miña piola… ola,ola,ola
Chámanme os rapaces
(O rei) (A raíña) da escola…
Ler o Manifesto do Día do Peón na aula e reflexionar sobre el e sobre a importancia dos xogos populares e as nosas tradicións.
Decorar peóns de distintos tamaños en folios ou cartolinas e expoñelos pola aula ou corredores.
Investigar sobre posibles xogos que se poden facer co peón, expoñelos pola aula ou corredores o propoñelos para as sesións de Educación Física ou para o recreo.
PLANTILLAS PARA COLOREAR E FACER BAILARETES DE CARTÓN
DÍA DO PEÓN
PARTES DO PEÓN
MANIFESTO DO DÍA DO PEÓN 2022
Un home sabio dixo unha vez un día que a infancia é aquel lugar onde se acadan os soños.
Cada vez que escoitamos esta palabra, infancia, véñennos á mente aqueles días de xogarreta cos amigos e amigas. O verán, cos seus días longos, era o tempo preferido por todos nós. Ata que a última raiola de sol non era engulida polo horizonte , alí estabamos cos xogos de sempre: a mariola, as añas de collida, hoxe chamadas o pilla, pilla; a de alto, a de agachadas, os ovos, os pelouros, a churra… moito temos suado e moito aprendido con eles.
Mais o verán remata e comeza o outono, tempo de escola, de apañar as uvas, as castañas e as noces…mais iso non quere dicir que o tempo de xogar tamén se fora cos últimos calores de agosto e menos as gañas de seguir xogando. Os xogos tradicionais teñen os seus momentos marcados no calendario. Había xogos para todos os días do ano e en cada estación os seus.
No outono, tempo de castañas, noces e vendimas, tamén se aproveitaba para podar árbores, derramalos e facer leña que encherá as lareiras, as cociñas ou as calefaccións e quentarán no inverno as nosas casas. Pero non todo ía ser combustible, tamén se aproveitaba para que algún carpinteiro, ebanista ou avó mañoso lle desen forma no torno ata saír un enredo que facía as delicias da rapazada. Estamos a falar da súa maxestade o peón, trompo, sevillana ou buxaina, que de moitas maneiras podemos nomear. Enredo bailador onde os haxa.
É o refraneiro popular, ¨polo San Martiño peóns ao camiño¨, o que nos sinala o comezo da tempada deste brinquedo que vai a estar con nós ata ben comezado o inverno e será alá polo mes de xaneiro onde San Antón mandaránolo gardar no caixón, San Amaro no faiado e Santa Olalla, que non se andará con panos quentes, convídanos a que o tiremos á borralla. Mais para que este ciclo se vaia pechando antes temos que abrilo e hoxe é o día. Hoxe tócanos dar o pistoletazo de saída a esta tempada e para iso debemos facer o ritual con moita orde e moita atención. O primeiro que temos que facer é coller o peón cunha man e coa outra o cordel , chamado propiamente piola. A continuación empezamos a atar ou enrolar o peón coa piola. Para iso comezamos a atalo ben no pirucho ou no ferrón, a gusto de cada un. Finalmente erguemos a man ata riba da cabeza e a de un, dous e tres, lanzámolo ao chan e a danzar ao ritmo desa canción que nos di:
Coa miña buxaina…baila,baila,baila
E a miña piola… ola,ola,ola
Chámanme os rapaces
(O rei) (A raíña) da escola…
Ningún comentario:
Publicar un comentario